Kristofer Leirdal
Kristofer Leirdal (1915-2010) var ein bilethoggar frå Aure kommune på Nordmøre. Leirdal laga fleire skulpturar til Nidarosdomen i Trondheim, hovudsakleg frå 1941 til 1942 og 1946 til 1983. Han var sentral i oppbygginga av eit vitalt kunstmiljø i byen. Leirdal var gift med Aina Thiis (f. 1924).
Utdanning
Leirdal si fagutdanning var: Møbellinja ved Statens Håndverks- og Kunstindustriskole i Oslo (1936-1938), bilethoggarlinja ved Statens Kunstakademi (1938-1940) og Det kongelige kunstakademi i København (1945-1946).
Arbeid
Kristofer Leirdal laga fleire hovudverk for Nidarosdomen, blant anna «Den seirende Kristus» (1956) og «St. Mikael» (1965). Han laga også andre verk som er utstilte offentleg: Krigsmonument ved Domkirkegården i Trondheim (1948), monument over dei omkomne etter Titran-ulykka på Frøya i 1899 (1949), «An-Magritt og Hovi-stuten» ved Ila kyrkje (1967), monument over krigsseglarane på Krigsseilerplassen i Trondheim (1982) og trerelieffet «Jola, Sola-hemmeln og Sjyn» i Aure rådhus (1985).
Anna
Leirdal var ein av stiftarane av Kunstskolen i Trondheim, og 1946-1952 var han lærar for skulpturklassen der. Han var også lærar i plastisk form ved Institutt for form og farge på arkitektavdelinga ved NTH 1952–1982. I utviklinga av Trondhjems Kunstforening spela Leirdal ei stor rolle, og han var også aktiv i utviklinga av det som i dag er Trondheim kunstmuseum.
Kjelder og linkar
- Arne Kristian Gansmo: Stor Domen-kunstner er død
- Harald O. Kalland: Om bilethoggaren Kristofer Leirdal. I: Årbok for Aure historielag, 2009
- Svein Thorud: Kristofer Leirdal
- Personleg brev frå Kristofer Leirdal ang. "Jola, Sola-Hemmeln og Sjyn", datert 29. oktober 1999 (privat eige)