MB «Joffre» M 13 VA

MB «Joffre»

MB «Joffre» M 138 S i Sande kommune

Det fyrste ein førebels har funne om båten er MB «Joffre» M 138 S, byggeår 1914, L/B/D: 37,5/11,6/5,5 norske fot, motor Volda 18 HK 4-takt semidiesel "glødehaudmotor" frå 1914. Eigar: Olav Myrvoll, Bringsinghaug til 1952. Båten var bygd som kutter med «svinerygg» og ein romsleg lugar med lugarkappe framme. Den har vanleg mekanisk spel med «lineskive» og «kopp» drive av framdriftsmotoren.

MB «Joffre» M 13 VA i Årset notlag

MB «Joffre» M 13 VA eller «Stylkå/Joffå» blei kjøpt av Årset notlag 3. januar 1952. Ved kjøp var notlaget klar over at båten var dårleg og måtte reparerast. Saumen var dårleg og det var rote i hekken. Båten skulle på slipp ved Volda Mekaniske Verkstad. Den vart lagd på Volda hamn kvelden før, her sokk den og det vart eit styr med heving og slippsetjing. Reparasjonen var oppattklinking, avsaging av hekk, isetjing av spegel og ombygging av rekkeliningen ned på spegelen. Dette vart ein svert vellukka konstruksjon til notbruk. «Joffre» vart lett å entre frå småbåtar. Etter ombygging var båten ca. 35 fot lang.

Det var ikkje til å unngå at båten fekk namnet «Stylkå» (ei høne som har misst vølefjørene) av oppfinnsome tilsette på Volda Mek. Motoren vart bytt eit år etter kjøp grunna slitasje og driftsproblem. No vart innsett ein brukt «Volda»-motor på 22 HK. Desse 22 HK-motorane hadde eit problem som dukka opp etter mange års bruk. Kjølevasspylinga sleit hol i sylindarveggen og det lak kjølevatn inn i sylindaren med motor-reparasjon som resultat. Dette skjedde her og på tur ut Voldsfjorden ein dag. Den vart så rar i lyden, rauk kvitt og stoppa.

I notlaget vart båten brukt til snurpenota der nota låg framom rorhuset på ein flake i heile båten si breidd. Der var 2 – 3 tommar mellom dekk og flaken, lufting for å hindre råte. På styrbord hjørne av rorhuset stod ein rull som verna ved setjing av not. Snurpelina vart dregen inn med det motordrivne spelet. Nota vart teken inn att med motordriven høg «sute» på styrbord side, derfor var det lett og godt å arbeide med nota.

Sommaren 1956 fekk MB «Joffre» ein stygg skade, sjå Årset notlag.

Ein leigde eit Atlas ekkolodd med turt papir med Karl (Kalle) Årset i 1953 og 1954 og hadde det i MB «Litleveiren» M 20 VA fyrste året, det vart kjøpt og montert i «Joffre».

Etter kvart vart dekket og rekkestøttene dårlege/opprotne og båten vart dregen på land ved nothuset, der låg den til den vart brend ca. 1965. Den vart utbytt med «Tempo» M 114 VA. «Joffre» er ein av innkjøpte båtar til Volda kommune som ikkje vart omregistrerte i Register over merkepliktige norske fiskefarkostar ved overføring frå Sande til Volda.

Motorar

1914: Volda 18 HK 4-takt, truleg innsett ny. Fylgde truleg båten frå nybygg til 1953.

1953: Kjøpt brukt «Volda», 22 HK 2-takt-motor av Gerhard Kvalsvik, Herøy.

Bilde frå Årset notlag med MB «Joffre» og MB «Litleveiren»

Bileta er meint å syne korleis korleis Årset notlag brukt båtane sine. Båtane stod på land om vinteren når Austefjorden er islagd. Om våren blir båtane botnsmurde og sjøsette. Frå nothengjet blir snurpa teken på på notbåten og stengjenøter og tauverk på sleparen. Snurpenota blir handtert frå MB «Joffre» ved hjelp av øyrebåten og med MB «Litleveiren» som slepar. Basen i loddebåten er arbeidsleiar.

• 

  Årset notlag sitt nothengje på Laberget på Aurstad

• 

  MB Litleveren M 20 VA blir_sjøsett

• 

  MB Joffre M 13 VA blir sjøsett

• 

  Øyrebåten

• 

  MB Joffre M 13 VA La nota gå

• 

  MB Joffre M 13 VA og MB Litleveiren M 20 VA

• 

  MB Litleveiren M 20 VA vil ta slepar ombord

• 

  MB joffre M 13 VA ein legg opp rullen i suta

• 

  MB Joffre M 13 VA med nota på suta

• 

  MB Litleveiren M 20 VA slepar MB Joffre M 13 VA

• 

  MB Litleveiren M 20 VA slepar

Kjelder og informantar

• Austefjord Museum
• Register over merkepliktige norske fiskefarkostar
• Fiskebåtregisteret ved Austefjord Museum
• Notfiske i Austefjorden, eit hefte utgjeve av Austefjord Museum
• Reknskap og dagbøker for Årset notlag til 1964
• Aarset, Hans f. 1936 som har vore med i Årset notlag og har gått gjenom rekneskap og notat
• Høydalsvik, Oddvar E. f. 1951